Mer sinn s Schyssdräggziigli uss Schwellheim und fyyre
im 2026 unser 50 jöörigs!

Fasnacht 2026 – Mer ziehn d Joker-Karte

50 Joor Schyssdräggziigli Allschwil

Waait dir kai styffe Wind an Grind?
Verdrausch du blind all dyne Frind?
Rein bruefligg gsee bisch voll im Soll?
Denn isch das toll und wundervoll.

Hesch au scho glooge? Machsch e Booge
grad wenn dy Lääbensfrooge blooge?
Statt ufe Trumpf im Ermel z warte,
ziehsch besser dyni Joker-Karte.

Dr Joker isch nit sehr sensybel,
eher penybel und flexybel.
Isch nyt, isch alles aber brilliert,
in däm är andri substituiert.

Bisch links, bisch rächts? Y main bolytisch.
Verfolgsch du alli Waale grytisch?
Ka me vo dir au «woke» erwaarte?
Ziehsch besser dyni Joker-Karte.

Was saisch ze Grieg und andre Gryyse?
Machsch Börsegwinn? Machsch numme Myyse?
Machsch öffentligg als schwarzi Faarte?
Ziehsch besser dyni Joker-Karte.

Kasch im Schützegraabe di erlaabe?
Zieht dy arrogants Gehaabe aabe?
Bisch ganz e Harte oder Zarte?
Ziehsch besser dyni Joker-Karte.

Bisch gaischtig nimm ganz uff dr Hööchi?
Gseesch nimm in d Wytti, nimme d Nööchi?
Akzeptiersch s Usstärbe vo Arte?
Ziehsch besser dyni Joker-Karte.

Macht d KI hit dy Job scho schnäller?
Hesch zwai, drey Lyyche in dym Käller?
Schaffsch statt im Büro als im Garte?
Ziehsch besser dyni Joker-Karte.

Statt schwygend numme d Joker z zieh,
gänn mir ys hitte alli Mieh.
Mir gönn als Joker jetz in d Hoose
und dien dr Marsch do inne bloose.